З'явіліся новыя здымкі сакрэтнай ядзернай базы ў Асіповічах

• 16.07.2025, 15:21

Яе будуюць расейцы.

Расея ўзмацняе сваю ядзерную інфраструктуру на фоне канфлікту ва Украіне і росту напружанасці з Захадам. Паводле спадарожнікавых здымкаў Planet Labs, атрыманых Business Insider, маштабнае будаўніцтва ідзе на пяці сакрэтных ядзерных аб'ектах, адзін з якіх у Беларусі.

Прыблізна за 8 км на ўсход ад Асіповічаў размешчана 1405-я база боепрыпасаў, дзе, паводле аналізу фота, у 2025 годзе з'явіўся новы, абгароджаны трохслаёвым парканам пляц з высокім узроўнем бяспекі.

У яго паўночна-ўсходнім куце цяпер стаіць сховішча, магчыма прызначанае для тактычных ядзерных набояў. Уваход на гэты пляц закрыты ад спадарожнікаў, што сведчыць аб падвышанай сакрэтнасці.

Аналітык Ганс Крыстэнсэн з Федэрацыі амерыканскіх навукоўцаў таксама адзначыў будаўніцтва пляцоўкі разгрузкі і новай дарогі, якая можа злучыць базу з чыгункай. Такі транспартны вузел мае ключавое значэнне для перавозкі ядзерных боегаловак, якія Расея, як правіла, транспартуе не па паветры, а па чыгунцы.

У Асіповічах, паводле звестак следчых, існуе яшчэ адна база, там размешчаныя пускавыя ўстаноўкі «Іскандэр». Яны здольныя запускаць ракеты з ядзернымі набоямі на адлегласць да 500 км. Са слоў Крыстэнсэна, гараж для гэтых установак быў пабудаваны, калі Расея перадала «Іскандэры» Беларусі ў канцы 2022 года.

Да сярэдзіны 2025 года база значна пашырылася: з'явіліся новыя будынкі і сховішчы, а на здымках бачныя сляды колаў цяжкіх транспартных сродкаў, што сведчыць аб актыўным выкарыстанні.

Нягледзячы на інфраструктурную гатоўнасць, экспэрты мяркуюць, што самі ядзерныя набоі пакуль знаходзяцца на тэрыторыі Расеі, напрыклад, у Бранску. Яны могуць быць дастаўленыя на беларускую тэрыторыю пры неабходнасці. Паводле ацэнак, галоўнае прызначэнне гэтых збудаванняў-рыхтаваць для РФ магчымасць аператыўнага разгортвання тактычных ядзерных узбраенняў у Беларусі.