У Магілёве супрацоўніца дзіцячага саду выхоўвала малых, размазваючы ім пясок па тварах

• 17.07.2025, 21:53

«Выхаванне» патрапіла на відэа.

У інтэрнэце з'явілася відэа, на якім жанчына, як мяркуецца, выхавальніца дзіцячага саду, груба абыходзіцца з дзецьмі, тыкае ім у твары рукой і нешта тлумачыць. Паводле сведчанняў відавочцаў, яна нават расцірала дзецям пясок па твары – на роліку відаць, як малыя пачынаюць плакаць, піша «Смартпрэс».

Карыстальнікі сацыяльных сетак спадзяюцца, што адказныя за гэта структуры разбяруцца ў сітуацыі і ўжывуць захады.

У адным з тэлеграм-каналаў, звязаных з сілавікамі, з'явілася паведамленне, што гэты інцыдэнт здарыўся ў адным з дзіцячых садоў у Кастрычніцкім раёне Магілёва і ўжо звярнуў увагу міліцыі.

Усе асобы, знятыя на відэа, як паведамляецца, вызначаныя, абставіны здарэння высвятляюцца.