ЕЗ пачаў працаваць над 19-м пакетам санкцый супраць Расеі

• 18.07.2025, 12:35

Кіраўнік МЗС Эстоніі раскрыў падрабязнасці.

Еўрапейскі Звяз (ЕЗ) не плануе здавольвацца «палавіністымі мерамі» супраць Расеі. Праца над 19-м пакетам санкцый ужо пачалася.

Пра гэта паведамляе РБК-Украіна са спасылкай на кіраўніка Міністэрства замежных спраў (МЗС) Эстоніі Маргуса Тсахкну, якога цытуе ведамства.

Са слоў Тсахкны, 18-ы пакет абмежаванняў дэманструе, што Еўропа застаецца нястомнай і смелай.

"Еўрапейскі Звяз свядома і паслядоўна падвышае кошт агрэсіі для Расеі. Кожны еўра, які Расея зарабляе ад продажу нафты, дапамагае фінансаваць яе кровапраліцце ва Украіне. Наша мэта - перакрыць гэтыя фінансавыя крыніцы", - дадаў ён.

Як адзначыў міністр, РФ павінна ўсвядоміць, што на міжнароднай арэне няма месца краіне, якая парушае міжнароднае права і нападае на суверэнныя дзяржавы, у сувязі з чым ЕЗ не спыніцца, пакуль краіну-тэрарыстку не прыцягнуць да адказнасці за развязаную вайну.

Ён дадаў, што праца над новым пакетам санкцый ужо пачалася.

«Мы не будзем здавольвацца палавіністымі мерамі. Кожны новы пакет узмацняе наша пасланне: Украіна не самотная, і Расея не застанецца беспакаранай», - заявіў міністр.