«Голас чутны нават праз зачыненыя вокны»
- 19.07.2025, 8:34
Менчукі не могуць спаць праз экзатычных "суседзяў".
Жыхары аднаго з дамоў на вуліцы Някрасава ў Менску сутыкнуліся з нечаканай праблемай: іх пачалі турбаваць крыкі паўлінаў, якіх завялі на пляцы ў прыватным сектары паблізу. Падрабязнасці распавядае «Смартпресс».
Са слоў мясцовай жыхаркі Марыі, птушкі асабліва актыўныя раніцамі ў выхадныя дні - блізу пяці гадзін, прычым іх голас чутны нават праз зачыненыя вокны.
Марыя падкрэслівае: не толькі яна і ейная сям'я страцілі сон з-за незвычайнага суседства. У дамавым чаце з тым, што праблема ёсць, пагадзіліся і некаторыя іншыя жыхары.
- У жыхароў дома два пытанні: наколькі законна ўтрыманне такіх жывёл у межах горада і калі законна, то ці можам мы неяк паўплываць на ўладальнікаў паўлінаў і пераканаць іх адмовіцца ад птушак, - кажа дзяўчына.
Калі журналісты прыехалі на месца здарэння, птушкі паводзілі сябе спакойна. Гаспадыня паўлінаў прызналася: яна падазравала, што яе гадаванцы могуць шумець, калі нікога няма дома, але пакуль ніхто на гэта не скардзіўся.
- Мы вымушаныя з'язджаць з горада па выходных, на гэты час пакідаем адчыненыя дзверы з птушніка ў вальер, і калі паўліны ў ім, яны могуць крычаць, асабліва цяпер, калі ў іх шлюбны перыяд, — патлумачыла жанчына.
Мінчанка паабяцала надалей прасіць суседку выпускаць паўлінаў толькі днём і заганяць назад да вечара, каб не перашкаджаць навакольным.
Што кажа закон?
У выніку канфлікт вырашыўся за лічаныя хвіліны. Суседзі пазнаёміліся, прыйшлі да паразумення і нават абмяняліся нумарамі тэлефонаў. А Марыя прапанавала сваю дапамогу: яна сама гатовая выпускаць і заганяць птушак, калі гаспадароў няма дома. Але не заўсёды людзям атрымліваецца дамовіцца адзін з адным. Ці могуць у гэтым выпадку тыя, хто зазнае нязручнасці ад жыўнасці суседзяў, дамагчыся спакою?
На гэтае пытанне адказала адвакатка Менскай гарадской калегіі адвакатаў Крысціна Асран.
- У Беларусі правілы ўтрымання свойскіх жывёл рэгулююцца шэрагам нарматыўных дакументаў, - тлумачыць адвакат. Міністэрствам прыродных рэсурсаў устаноўлены пералік відаў дзікіх жывёл, забароненых да ўтрымання і (або) гадоўлі ў няволі ў кватэрах шматкватэрных і блакаваных жылых дамоў, аднакватэрных жылых дамах і на прыдамавых тэрыторыях, у садаводчых таварыствах, садовых кааператывах. У гэтым спісе паўлінаў няма, з чаго вынікае, што іх утрыманне на прыдамавой тэрыторыі аднакватэрнага дома дапушчальнае.
Але пры гэтым, падкрэслівае суразмоўца, важна выконваць патрабаванні іншых нарматыўных актаў. Правіламі карыстання жылымі памяшканнямі, утрымання жылых і дапаможных памяшканняў устаноўлена патрабаванне ў перыяд з 23 да 7 гадзін не здзяйсняць дзеянні, якія ствараюць вібрацыю і шум (у тым ліку з дапамогай утрымання свойскіх жывёл і іншых дзеянняў). Азначанае патрабаванне распаўсюджваецца на жыхароў як аднакватэрных дамоў — прыватных дамоў, так і шматкватэрных.
За яго парушэнне прадугледжана адміністрацыйная адказнасць у выглядзе штрафу па ч.1 і ч. 2 арт. 22.12 Кодэкса аб адміністрацыйных правапарушэннях. Пратаколы аб адміністрацыйных правапарушэннях у гэтым артыкуле маюць права складаць службовыя асобы органаў унутраных спраў, таму, калі жывёлы шумяць і перашкаджаюць ноччу альбо ранняй раніцай, можна звярнуцца ў міліцыю.
- Правіламі добраўпарадкавання і ўтрымання горада Менска ўстаноўлены абавязак уласніка аднакватэрнага жылога дома забяспечыць будаўніцтва і ўтрыманне вальераў для жывёл і агароджы прыдамавой тэрыторыі вышынёй не менш за 1,7 метра ў выпадку выгулу жывёл, — дадае Крысціна Асран. - За парушэнне гэтых правілаў таксама прадугледжаны штраф. Сутыкнуўшыся з невыкананнем правілаў добраўпарадкавання і ўтрымання Менска, чалавек мае права звярнуцца ў органы ўнутраных спраў або адміністрацыю раёна з адпаведнай заявай.
Не варта забываць і пра закон «Аб адказным абыходжанні з жывёламі», дзеянне якога распаўсюджваецца на жывёл-кампаньёнаў. Да іх можна аднесці і паўлінаў, калі выказаць здагадку, што ўладальнікі завялі птушак для задавальнення сваіх эстэтычных патрэб. Закон абавязвае гаспадароў абыходзіцца з жывёлай, не парушаючы правы і законныя інтарэсы іншых фізічных і юрыдычных асоб.
Каго нельга ўтрымліваць дома?
Адвакатка ўдакладніла, што ў пераліку відаў, забароненых да ўтрымання і (або) гадоўлі ў няволі, належаць фламінга, пінгвіны, афрыканскія і аўстралійскія страусы і шэраг іншых птушак.
Акрамя таго, дакумент выключае магчымасць утрымання ў хатніх умовах у Беларусі львоў, тыграў, шымпанзэ, жыраф, мядзведзяў, марскіх чарапах, кобр і многіх іншых прадстаўнікоў жывёльнага свету.