Кандаліза Райс – пра ўльтыматум Трампа Пуціну: Наступіў пераломны момант

• 20.07.2025, 10:19

Экс-дзяржсакратарка ЗША назвала гэта «найлепшай навіной».

Дзяржсакратарка ЗША ў 2005–2009 гадах Кандаліза Райс уважае змену рыторыкі прэзідэнта ЗША Дональда Трампа датычна краіны-агрэсаркі Расеі, якая прасочваецца цягам апошніх некалькіх тыдняў, за пераломны момант у амерыканскіх мірных намаганнях у расейска-ўкраінскай вайне. Пра гэта яна заявіла 17 ліпеня на форуме ў бяспецы ў Аспене (штат Каларада), відэа выступу ў YouTube апублікаваў Інстытут Аспена.

Яна пракаментавала ўльтыматум кіраўніка Белага дому ад 15 ліпеня, які прадугледжвае, што нелегітымны прэзідэнт Расеі Уладзімір Пуцін павінен цягам 50-дзённага тэрміну спыніць вайну ва Украіне, інакш ЗША ўжывуць супраць Расеі другасныя санкцыі. Таксама падкрэсліла пазітыўны прагрэс у стасунках ЗША і Еўропы і іх супольныя пастановы наконт Украіны.

«Думаю, найлепшая навіна, якую мы можам паведаміць украінскаму народу, заключаецца ў тым, што ЗША і Еўропа нарэшце прыйшлі да адзінай думкі, што Уладзіміра Пуціна не спыніць словамі. Яго можна спыніць толькі ў тым выпадку, калі ён сам зразумее, што далей нельга ісці, што далей перамагчы немагчыма», – сказала яна.

На пытанне, як, на яе думку, можна спыніць Пуціна, Райс выказала меркаванне, што гэта магчыма дзякуючы дэманстрацыі сілы і пры далейшай падтрымцы Украіны.

«Мяркую, што апошні тыдзень стаў пераломным. Гэта быў пераломны момант», – падкрэсліла яна.

Былая дзяржсакратарка адзначыла, што Трамп раззлаваны на кіраўніка Крамля, які, прадаўжаючы агрэсію, выстаўляе амерыканскага прэзідэнта ў не найлепшым свеце, і гэта спрыяе такому прагрэсу. Таксама яна падкрэсліла, што ў асяроддзі кіраўніка Белага дому ёсць дасведчаныя людзі, якія ўвесь час паказваюць яму на тое, што «Пуцін не рэагуе на словы, ён рэагуе на сілу».

У той самы час Райс прызнала, што ўжыць другасныя санкцыі супраць Расеі будзе складана праз пазіцыю Кітая і Індыі. Хоць, паводле ейных словаў, гэтыя захады былі б балючымі для РФ.

«Кітаю… з эканомікай не ў найлепшай форме… ці Індыі, якая насамрэч не хоча быць з няправільнага боку канфлікту, магчыма, трэба задумацца, ці вартая гэтага танная расейская нафта», – адзначыла яна.