Паміж Менскам і Масквой узнік авіяцыйны калапс

• 20.07.2025, 11:20

Аэрапорты паведамілі пра скасаванне і затрымку самалётаў.

Нацыянальны аэрапорт Менск і маскоўскі аэрапорт «Шарамеццева» паведамілі пра скасаванне двух рэйсаў з Масквы ў Менск і назад 20 ліпеня. Яшчэ адзін рэйс перанеслі на больш позні час, піша Telegraf.news.

Паводле звестак табло аэрапортаў, скасавалі наступныя рэйсы з Шарамеццева ў менскі аэрапорт:

SU1834 – павінен быў прыляцець 20 ліпеня ў 03:55;

SU1842 – павінен быў прыляцець 20 ліпеня ў 13:45.

Аэрапорты паведамілі пра скасаванне і затрымку самалётаў з Масквы ў Менск і назад

Адпаведна, скасавалі і вылеты з Менска: SU1835 адпраўленнем у 06:30 і SU1843 адпраўленнем у 14:45.

Акрамя таго, яшчэ адзін рэйс «Аэрафлота» – SU1845 – значна адклалі. Ён павінен быў вылецець з Менска ў Маскву ў 04:25, але цяпер час вылету перанесены на 15:00.

Пры гэтым астатнія рэйсы Масква – Менск і Менск – Масква на гэты момант выконваюцца паводле раскладу.

Тым часам, паводле інфармацыі СМІ, доўгія затрымкі і пераносы рэйсаў у аэрапортах «Шарамеццева» і «Унукава» 20 ліпеня пачаліся праз начны напад беспілотнікаў. У Мінабароны РФ заявілі, што збілі 16 БПЛА, якія атакавалі Маскву. Вядома, што ўвечары і ноччу 19–20 ліпеня ў Шарамеццеве тройчы ўводзілі план «Дыван» (закрывалі паветраную прастору над вызначанай тэрыторыяй): у 21:37, 22:35 і 00:37.

У Расавіяцыі паведамілі, што ў перыяд абмежаванняў на запасныя аэрадромы пайшлі 134 самалёты.

У сваю чаргу ў сеціве з'явіліся відэа абстаноўкі ў маскоўскіх аэрапортах. СМІ паведамілі пра «велізарныя чэргі».

Раней Telegraf.news пісаў, што Беларуская чыгунка 20 ліпеня папярэдзіла пра парушэнне графіка руху цягніка №301 Адлер –Гомель/Менск праз аварыю на расейскай тэрыторыі.