Спевака-пуцініста Баскава абвесцілі ў вышук

• 20.07.2025, 12:37

Для яго ўжо абралі захад стрымання.

Служба бяспекі Украіны (СБУ) абвесціла ў вышук народнага артыста РФ Мікалая Баскава. Гэта першым заўважыла расейскае дзяржагенцтва ТАСС 20 ліпеня.

Пры гэтым, паводле звестак СМІ, Баскаў знаходзіцца ў вышуку ва Украіне з сакавіка 2022 года. Спевака абвінавацілі ў «замаху на яе тэрытарыяльную цэласнасць», а таксама ўжо абралі завочны захад стрымання – утрыманне пад вартай.

Пры гэтым з 2017 года імя артыста фігуруе ў спісах украінскага сайта «Міратворац».

Дарэчы, у лістападзе 2024 года прэзідэнт Украіны Уладзімір Зяленскі падпісаў указ аб пазбаўленні Баскава дзяржаўных узнагародаў краіны.

Згодна з адкрытымі звесткамі, у вышук абвешчаныя і іншыя вядомыя расейцы, у тым ліку:

міністр асветы РФ Сяргей Краўцоў;

кіраўніца Цэнтральнага банка РФ Эльвіра Набіуліна;

генеральны дырэктар кінаканцэрна «Масфільм», народны артыст РФ Карэн Шахназараў;

дэпутат Дзярждумы, народны артыст РФ Дзмітрый Пяўцоў;

спявачка Таісія Павалій.

Усе яны, як і Баскаў, фігуруюць у базах украінскіх сілавых структураў.