У Іране перакуліўся аўтобус: Больш за 20 загінулых і дзясяткі параненых
- 20.07.2025, 14:09
Выратавальныя аперацыі да гэтага часу прадаўжаюцца.
Учора, 19 ліпеня сама меней 21 чалавек загінуў у аварыі аўтобуса на поўдні Ірана. Інцыдэнт здарыўся каля горада Шыраз у правінцыі Фарс.
Пра гэта паведамляе AP.
Паводле звестак кіраўніка службы надзвычайных сітуацый правінцыі Масуда Абеда, у ДТЗ таксама пацярпелі 34 чалавекі.
Выратавальныя аперацыі да гэтага часу прадаўжаюцца, канчатковыя звесткі ўдакладняюцца пасля заканчэння расследавання.
Інцыдэнт адбыўся блізу 11:05 раніцы, ратавальнікі прыбылі на месца здарэння аператыўна. Прычыны перакульвання аўтобуса цяпер высвятляюцца.
Іран займае адно з лідарскіх месцаў у свеце ў колькасці ахвяраў дарожна-транспартных здарэнняў – штогод тут гіне блізу 17 тысячаў чалавек.
Гэта звязваюць з невыкананнем правілаў бяспекі, старымі транспартнымі сродкамі і нізкай эфектыўнасцю службаў экстраннай дапамогі.