Шварцэнэгер прызнаўся, што учыняў «брыдкасць» Сталонэ



• 3.07.2025, 14:53

Памірыў дзвюх зорак сумесны бізнэс-праект.

Вядомы галівудскі актор і былы губернатар Каліфорніі Арнольд Шварцэнэгер расказаў, што ў 80-х паміж ім і яго калегам Сільвестрам Сталонэ была сапраўдная нянавісць, піша Fox News (пераклад - сайт Charter97.org). Ён прызнаўся:

«Мы ненавідзелі адзін аднаго. Мы лаяліся, казалі брыдкасць, рабілі дурасць…»

Варожасць дзвюх зорак баевікоў завяршылася толькі к пачатку 2000-х. Ключавым крокам да перамір'я стаў сумесны бізнес - сетка рэстаранаў Planet Hollywood, створаная з удзелам зорак Роберта Эрла, Кіта Пэрыша і іншых зорак, уключна з Брусам Уілісам і Вупі Голдберг.

«Адвакат, які прадстаўляў нас абодвух, патэлефанаваў і спытаў: «Арнольд, ці ёсць месца для Слая ў Planet Hollywood?» — успамінае Шварцэнэгер.

“Я падумаў: гэта добрая ідэя. Гэта можа нас зблізіць. І я гэтага хацеў», - дадаў ён.

Шварцэнэгер прызнаўся і ў хітрасці: ён падставіў Сталонэ, прымусіўшы таго зняцца ў правальнай камедыі «Стой! Ці мая мама будзе страляць» (1992).

«Я не ўгаворваў яго - я зрабіў выгляд, што сам вельмі хачу гэтую ролю. Ён павёўся», - прызнаўся Арнольд.

Нягледзячы на мінулыя інтрыгі, сёння два акцёры — сябры. Хоць Сталонэ і жартуе, што роля ў фільме да гэтага часу пляма ў ягонай фільмаграфіі - дзякуючы Арнольду.