У Беларусі штомесяц збіраюць звесткі аб колькасці «дармаедаў»

• 3.07.2025, 15:15

Беспрацоўных выклікаюць у РАУС на сходы.

Міністэрства ўнутраных спраў стала патрабаваць ад дзяржструктур прадастаўлення звестак аб "працаздольных грамадзянах, не занятых у эканоміцы", штомесяц. Дзеля гэтага рассылаюцца формы справаздачнасці, якія павінны запаўняцца да пачатку кожнага месяца. Затым звесткі абагульняюць і накіроўваюць у МУС у выглядзе справаздачы, распавяла «Флагштоку» крыніца ў сістэме выканаўчай улады.

Як паведамлялі раней, органы ўнутраных спраў сумесна з управамі ў працы і занятасці, раённымі камісіямі ў садзейнічанні працаўладкаванню “ выхоўваюць грамадзян", якія знаходзяцца ў базе "незанятых у эканоміцы".

Сутнасць заключаецца ў тым, што афіцыйна беспрацоўных выклікаюць у РАУС на сходы, якія называюць "выхаваўчымі" і "прафілактычнымі" акцыямі, праводзяць гутарку аб тым, што неабходна працаваць, і накіроўваюць усіх у Цэнтр занятасці для выбару вакансіі.

Гэта адбываецца ў рамках "Комплексу дадатковых мер прафілактычнага ўздзеяння ў адносінах да працаздольных грамадзян, незанятых у эканоміцы", які з 1 красавіка 2025 года рэалізуе МУС.