TIME: Свету трэба больш людзей

• 3.07.2025, 19:11

Прагрэс, тэхналагічныя дасягненні сталі магчымыя дзякуючы вялікай колькасці людзей.

Свет стаіць не на парозе перанасялення, а на мяжы дэмаграфічнага спаду, сцвярджаюць эканамісты Дын Спірс і Майкл Джэруза ў сваёй новай кнізе «After the Spike» («Пасля ўсплёску»), піша часопіс TIME (пераклад – сайт Charter97.org).

Паводле іхніх словаў, насельніцтва Зямлі імкліва наблізілася да свайго піку і ў найбліжэйшыя дзесяцігоддзі пачне скарачацца. У 2012 годзе зафіксаваны рэкорд – 146 мільёнаў нованароджаных, але з тых часоў нараджальнасць падае, і ўжо цягам паўстагоддзя смяротнасць перавысіць колькасць нараджэнняў.

На меркаванне аўтараў, дэмаграфічны спад можа стаць такой самай сур'ёзнай праблемай, як кліматычныя змены. І калі тэндэнцыя захаваецца, то «вярнуць усё назад» будзе вельмі складана. Прычыны зніжэння нараджальнасці – не толькі эканамічныя, але і культурныя. У краінах з высокім узроўнем жыцця і адукацыі нараджальнасць стабільна падае, нават нягледзячы на доступ да тэхналогій, сацпадтрымку або ўзровень рэлігійнасці.

Адзін з галоўных тэзісаў кнігі – людзі прыносяць больш карысці, чым шкоды. Гістарычны прагрэс, барацьба з беднасцю і тэхналагічныя дасягненні сталі магчымыя дзякуючы вялікай колькасці людзей – іх ведаў і інавацый. Паводле словаў Спірса, усе ключавыя экалагічныя перамогі – ад забароны свінцовага бензіну да абароны азонавага слою – дасягаліся не за кошт памяншэння насельніцтва, а дзякуючы палітыцы і навуковаму прагрэсу.

Аўтары заклікаюць да пераасэнсавання ролі чалавека ў будучыні планеты і стварэння ўмоваў, пры якіх сем'і, якія хочуць мець больш дзяцей, змогуць гэта рабіць. Толькі так можна ўнікнуць непрадказальных наступстваў глабальнай дэпапуляцыі.