Зяленскі ўручыў узнагароду дацкаму хлопчыку, які дапамагае украінскім дзецям

• 3.07.2025, 21:17

Ён сабраў на дапамогу 34 тысячы дацкіх кронаў.

Прэзідэнт Украіны Уладзімір Зяленскі ўручыў у Даніі спецыяльную ўзнагароду «Будучыня Украіны» 11-гадоваму валанцёру Енсу Фогу Томсэну. Ён сабраў больш за 34 тысячы дацкіх кронаў (3200 даляраў) для набыцця школьных заплечнікаў і прыладаў для ўкраінскіх дзяцей, якія пацярпелі ад вайны, расказаў кіраўнік дзяржавы.

Прэзідэнт Украіны адзначыў, што Енс займаецца вырабам велікодных упрыгожванняў уручную і дзякуючы іх продажу дапамагае ўкраінскім дзецям.

«Енс стаў першым замежнікам, які атрымаў гэтую ўзнагароду. Мы заўсёды будзем удзячныя ўсім, хто шчыра спачувае нашаму народу і дапамагае Украіне. Я глыбока ўдзячны Енсу – ад імя ўсяго нашага народа і дзяцей Украіны», – адзначыў Зяленскі.