Прэзідэнт Польшчы прыехаў на мяжу з Беларуссю

• 4.07.2025, 20:08

Анджэй Дуда падзякаваў памежнікам за абарону межаў краіны.

Прэзідэнт Польшчы Анджэй Дуда, які хутка пакіне сваю пасаду, наведаў мяжу Польшчы з Беларуссю ў Падляшскім ваяводстве і пагутарыў з памежнікамі.

Пра гэта паведамляе RMF24.

Дуда прыехаў да памежнікаў у Ярылуўцы, што пад мяжой з Беларуссю, і падзякаваў ім за абарону межаў краіны, асобна згадаўшы сяржанта, якога летась смяротна параніў адзін з нелегальных мігрантаў.

Таксама Анджэй Дуда папрасіў прабачэння ў памежнікаў «за непрыемнасці з боку некаторых нашых суграмадзянаў... часам безадказныя, а часам проста бессэнсоўныя і хамскія».

Як вядома, Анджэй Дуда, які з'яўляецца прадстаўніком цяпер апазіцыйнай партыі «Права і справядлівасць», неўзабаве перадасць пасаду абранаму прэзідэнту Каралю Наўроцкаму. Ён зазначыў, што быў бы зацікаўлены ў пасадзе прэм'ер-міністра пасля прэзідэнцтва.