Пажар на «УНДІР-Прагрэс»: Дроны атакавалі ключавы завод электронікі ў РФ

• 5.07.2025, 10:19

Новыя падрабязнасці паспяховага ўдару.

У ноч на 5 ліпеня ўдарныя беспілотнікі атакавалі вытворчы цэх прадпрыемства «УНДІР-Прагрэс» у Чэбаксарах, Чувашская Рэспубліка РФ. У выніку трапляння ў цэх, дзе вырабляюцца электронныя кампаненты, пачаўся пажар, піша Astra.

Атаку пацвердзіў кіраўнік рэспублікі Алег Нікалаеў, заявіўшы пра хуткае рэагаванне экстранных службаў і лакалізацыю загарання. Паводле ягоных словаў, вытворчасць у гэтым будынку была нібыта прыпыненая яшчэ пасля папярэдняга ўдару ў чэрвені.

«Адзін дрон упаў на дах пустога будынка АТ "УНДІР", вытворчасць на якім прыпыненая пасля папярэдняй атакі ў чэрвені сёлета, другі пашкодзіў склад, які будуецца на Лапсарскім праездзе», – паведаміў Мікалаеў.

Чым займалася «УНДІР-Прагрэс»

Паводле інфармацыі «Мілітарнага», прадпрыемства ўваходзіць у склад аб'яднання «АБС Электра» і ўважаецца за ключавога вытворцу антэнаў серыі «Камета». Гэтыя прылады выкарыстоўваюцца ў расейскіх ударных беспілотніках, уключаючы дроны-камікадзэ «Shahed», а таксама ў ракетах «Іскандэр-М» і «Калібр».

Акрамя антэнаў, завод выпускае ГНСС-прымачы для сістэмаў навігацыі GLONASS, GPS і Galileo, а таксама праграмна-апаратныя комплексы для суднабудавання і энэргетыкі. У пералік прадукцыі ўваходзяць SCADA-сістэмы, праграмаваныя электрапрывады, SDR-радыёкомплексы, электронныя модулі і кампаненты інтэгральнай мікраэлектронікі (СВІС).

Асаблівую ролю прадпрыемства выковнае і ў забеспячэнні патрэбаў ВМФ Расеі: УНДІР-Прагрэс пастаўляе электратэхнічнае абсталяванне, уключаючы рэле, аўтаматы і модулі для атамных падводных лодак праекту «Ясень-М».