Міністр Нямеччыны выступіў супраць забароны садзіцца за стырно пасля келіха шампанскага

• 5.07.2025, 13:43

Напой з ветлівасці ўжываюць на свецкіх імпрэзах.

Федэральны міністр транспарту Нямеччыны Патрык Шнідэр выступіў супраць скасавання памежна дапушчальнага ўтрымання алкаголю ў крыві кіроўцаў.

Пра гэта ён заявіў у інтэрв'ю выданню Funke Mediengruppe, паведамляе Spiegel.

Цяпер у Нямеччыне кіроўцам ва ўзросце ад 21 года дазваляецца мець 0,5 праміле алкаголю ў крыві, каб садзіцца за стырно. Але нядаўна міністр транспарту зямлі Брандэнбург Дэтлеф Таберт заклікаў знізіць яго да нуля.

«Я, вядома, рэкамендую садзіцца за стырно без алкаголю», – пракаментаваў прапанову Шнідэр.

У той самы час ён заявіў, што ўважае цяперашнюю мяжу 0,5 праміле за «дастатковую і мэтавую».

«На многіх свецкіх мерапрыемствах з ветлівасці людзі паднімаюць келіх і робяць глыток, не ставячы тым самым пад пагрозу дарожны рух», – растлумачыў федэральны міністр.

Больш катэгарычна, аднак, кіраўнік нямецкага Міністэрства транспарту выказаўся наконт спажывання кіроўцамі канабісу.

«Уплыў гэтага рэчыва на дарожны рух я ўважаю за даволі непрадказальны. Мы павінны ўважліва разгледзець гэтае пытанне цягам гэтага выбарчага перыяду», – заклікаў Шнідэр.

У Нямеччыне кіроўцы з узроўнем алкаголю ў крыві меней за 0,5 праміле не караюцца, калі яны не выяўляюць прыкметаў няздольнасці кіраваць транспартным сродкам. У адваротным выпадку, у залежнасці ад утрымання алкаголю ў крыві, ім пагражае штраф ці крымінальная адказнасць.