Раптоўная паводка ў Тэхасе: з'явіліся новыя звесткі

• 6.07.2025, 11:15

Сярод загінулых - дырэктар і дзеці з летняга лагера.

Цэнтральны Тэхас пакутуе ад маштабнай паводкі, якая ўжо забрала жыцці сама меней 51 чалавека.

Аб гэтым паведамляе Axios.

Стыхія ўдарыла раптоўна - сярод ахвяр шмат дзяцей, якія знаходзіліся ў прыватным лагеры для дзяўчат паблізу ракі Гвадэлупы.

Што вядома

Паводка пачалася раніцай 4 ліпеня паблізу ракі Гвадэлупы, за 100 км на паўночны захад ад Сан-Антоніё.

Праз моцныя ападкі вада імкліва выйшла з берагоў, затапіўшы лагеры, дарогі і жылыя раёны. Больш за ўсё пацярпелі акругі Кер, Трэвіс, Бернэт і Кендал.

У акрузе Кэр, дзе размешчаны прыватны дзявочы лагер «Містык», знойдзеныя целы 43 загінулых. З іх 12 дарослых і пяцёра дзяцей яшчэ не ідэнтыфікаваныя.

У лагеры дагэтуль зніклымі ўважаюцца 27 дзяўчат.

Мясцовыя ўлады таксама пацвердзілі яшчэ восем смерцяў у суседніх акругах:

4 - у акрузе Трэвіс (Остын)

3 - у акрузе Бернэт

1 - у акрузе Кендал

Сярод загінулых - дырэктар лагера «Містык» Дзік Істленд і трое дзяўчат ва ўзросце 8-9 гадоў: Ліла Бонэр, Джэні Хант і Сара Марш.

Што гавораць ва ўладзе

«Уласнымі вачамі бачыў у пахавальным бюро дзясяткі мяшкоў для целаў. Гэта разбівае сэрца», - заявіў суддзя акругі Кэр Роб Келі.

Міністр унутранай бяспекі ЗША Крысці Ноэм паабяцала мадэрнізаваць сістэму ранняй абвесткі.

Выратавальныя аперацыі працягваюцца. Пошукавыя групы прыцягваюць сабак, дроны і авіяцыю. Дождж не спыняецца, а ўзровень вады ў некаторых раёнах працягвае расці.

Нагадаем, што ўзровень вады дасягнуў у Тэхасе 8 метраў усяго за 45 хвілін, размываючы дарогі і змываючы нават карэты хуткай дапамогі. У асобных месцах вада дасягала амаль 9 метраў.

5 ліпеня шэрыф акругі Лары Лейта паведаміў на вячэрняй прэс-канферэнцыі, што больш за 230 чалавек эвакуяваныя або выратаваныя цягам пятніцы, многія з іх - з дапамогай верталётаў.